攏是台灣儂
Lorng Si Tai'uaan-Laang
唔免目箍紅
Mxbern bagkhof aang
唔免心沉重
Mxbern sym tintang
咱攏是台灣儂
Larn lorng si Tai'uaan-laang
不管汝店山地
Putkuarn lir tiaxm svuate
抑海港 不管
ia haykarng putkuarn
汝滯田庄 或是
lir tuax zhanzngf hegsi
市內兮大街小巷
chi lai ee tua kef sior hang
不管漳抑泉
putkuarn ciofng ia zuaan
不管福佬或客儂
putkuan hokloer hek kheklaang
不管來自黃河長江
putkuarn laai zu Nghooe Tiongkafng
福州或是廈門港
Hokciw hek si Haxmngg-karng
汝兮心肝有台灣
lir ee simkvuaf u Tai'uaan
汝我攏是台灣儂
lir-guar lorng si Tai'uaan-laang
抱着咱兮夢
Phoe tioeh larn ee bang
親像咱兮祖先
chinchviu larn ee zofsefn
勇敢來出帆
iofngkarm laai zhutphaang
拚過烏水溝
phviax kuex ozuykaw
追求民主兮美夢
tuikiuu binzur ee bybang
拚命駛牛犁
pviarmia sair gulee
唔驚風冷霜凍
mxkviaf hofng lerng sngf taxng
做一個飄撇
zoex cidee phiaupheg
有尊嚴兮台灣儂
u zungiaam ee Tai'uaan-laang
雖然各業各行
Suijeen kokgiap kokhaang
討趁無輕鬆
thoefthaxn booe khinsfng
但是唔免心濛濛
taxnsi mxbern sym bangbaang
不管作穡做工
putkuarn zoersid zoerkafng
不官擔菜賣葱
putkuarn tvaf zhaix be zhafng
咱兮血汗沃落塗
larn ee huehkvua ag loeh thoo
咱兮前途有向望
larn ee zengtoo u ngrbang
汝兮心肝有台灣
Lir ee simkvuaf u Tai'uaan
汝我攏是台灣儂
lir-guar lorng si Tai'uaan-laang
攏是台灣兮主儂
lorng si Tai'uaan ee zwlaang
南風佮稻香
Laam Hofng kab Tiuxphafng
南風，南風
Laam hofng, laam hofng
芳貢貢兮南風
phafng korngkoxng ee laam hofng
好食，好食
Hoefciah, hoefciah
真好食，真好食兮
cyn hoefciah, cyn hoefciah ee
滋味，唯
zubi, ii
埕尾、唯曝粟仔埕
tviabuer, ii phak zhek'ar-tviaa
唯風鼓兮搖動
ii hongkor ee ioetong
飄送來兮
phiausaxng laai ee
迄種滋味
hid ciorng zubi
是芳貢貢兮南風
si phafng korngkoxng ee laam hofng
貢貢芳兮南風
korngkoxng phafng ee laam hofng
（食了、佫想
(ciah liaur, koeq sviu
卜食、食了
bueq ciah, ciah liaur
佫想、卜食）
koeq sviu, bueq ciah)
啊 我愛困矣
aq guar aix khuxn aq
無偌遠 田園迄爿
booe jua hng zhanhngg hid peeng
金光閃閃 佇
kimkngf siafmsiarm ti
我愛困兮面前
guar aix khuxn ee bixnzeeng
搭一條閃晣發光
taq cit-tiaau siafmsiq huatkngf
兮萬里稻香
ee baxnlir tiuxphafng
三月誠水
Svaf`gueh Cviaa Suir
三月誠水
Svaf`gueh cviaa suir
逐家攏安爾講
tagkef lorng afnnef korng
阿榮兮阿公
a'Eeng ee akofng
嘛是安爾講
ma si afnnef korng
伊手裡兮枴仔
y chiur`nih ee kuay'ar
扶伊過橋東
huu y kuex kiooe tafng
伊一面欣賞三月兮
y cidbin himsiorng svaf gueh ee
煙景 一面唸
enkerng cidbin liam
「雪淡風輕近午天
“suad tam hofng khyn kin gvof thefn
傍花隨柳過前川」
pngx huaf suii liur kuex zeeng zhuafn”
三月誠水
Svaf`gueh cviaa suir
逐家攏安爾講
tagkef lorng afnnef korng
咱兜兮狗
larn taw ee kaur
嘛是安爾講
ma si afnnef korng
伊不時咧追趕
y putsii teq tuikvuar
柳枝洩露兮春光
liwky siablau ee zhunkofng
阿媽
三月誠水
a'mar svaf`gueh cviaa suir
逐家攏安爾講
tagkef lorng afnnef korng
逐家攏坐快稠
tagkef lorng ze be tiaau
想卜出去行行咧
sviu bueq zhutmngg kviakviaa leq
齩一喙春色
ka cit-zhuix zhunseg
但是
阿媽
taxnsi amar
汝盍無卜轉來
lir khaq booe bueq tngr`laai
阮佮小弟
zhua guarn kab sioefti
去田頭行行咧
khix zhanthaau kviakviaa leq
去看三月兮草青
khix khvuax svaf gueh ee zhaur chvy
看苦楝樹咧開花
khvuax khoflen'ar chiux teq khuihuef
聽園裡兮雉雞咧啼
thviaf hngg`nih ee thiqkef teq thii
──田頭松仔頂兮鳥秋講
------zhanthaau zheng'ar terng ee ochiw korng
阿媽老去啦
amar lau`khix laq
伊行袂振動
y kviaa be tyntang
伊無法度唯塗州行轉來
y booe huatto ui thociw kviaa tngr`laai
三月
逐項攏好
Svaf`gueh taghang lorng hoer
我加足大漢
guar kef ciog tuaxhaxn
小弟嘛加足懸兮
sioefti ma kef ciog kuaan`ee
逐家攏好 阿媽
tagkef lorng hoer amar
厝內大細平安
zhurlai tuaxsex peng'afn
逐家攏好
tagkef lorng hoer
干礁無阿媽
kantvaf booe amar
互阮心頭艱苦
ho guarn symthaau kankhor
阿輝兮娘
A'huy ee Niaa
阿輝也出山了後
A'Huy`ar zhutsvuaf liaw'au
阿輝兮娘
a'Huy ee niaa
目屎拭拭咧
bagsir chitchid leq
伊無愛佫哭
y booe aix koeq khaux
伊希望悲慘夠遮為止
y hibang pizharm kaux ciaf uicir
伊 清早
起來
y zhengzar peq`khylaai
探一下天色
thaxm cide thviseg
一喙清飯
pef cit-zhuix chirnpng
勻勻仔吞勻勻仔
unun'ar thwn unun'ar
吞一枝一枝兮蕃薯籤
thwn cit-ky cit-ky ee hancii-chiafm
吞一枝一枝傷心兮往事
thwn cit-ky cit-ky siongsym ee ofngsu
然後去大圳頭
Jen'au khix tuaxzuxn-thaau
溪仔邊行來行去
khear pvy kviaa laai kviaa khix
然後去苦楝樹跤
jen'au khix khoflen'ar-chiu khaf
咿咿啞啞唱一首
i'y-a'af chviux cit-siur
不成曲調家已編兮歌
putseeng khektiau kati pefng ee kuaf
然後去行田岸
Jen'au khix kviaa zhanhvua
去料想世事兮無常
khix liauxsiorng sersu ee boesioong
去測量悽慘兮終站
khix zheklioong chvizharm ee ciongzam
去估計悲哀兮極限
khix kofkex pi'ay ee kek'han
然後
甚麼亦
jen'au sviafmih ia
無愛想
伊
booe aix sviu y
只不過
摸伊
cy putkox bofng y
疼痛兮胸匣
thviarthaxng ee heng'ar
伊疼痛兮心
y thviarthaxn ee sym
然後日落黃昏時
Jen'au jitloeh hoxnghwn sii
喙齩一葉竹葉
zhuix ka cit-hioer tekhioer
手棺一籃
兮
chiur kvua cit-lvaa lenglefng ee
油菜花行牛車路
iuzhaix-huef kviaa guchiaf-lo
轉去 轉去兮
tngr'khix tngr`khix ee
牛車路 暮色蒼茫
guchiaf-lo bogseg zhongboong
暗時仔誠暗
Armsii'ar cviaa axm
伊點一葩番仔火
y tiarm cit-phaf huan'ar-huer
看一下熏烏去兮
khvuax`cide hwn of khix ee
壁堵 看
piahtor khvuax
以後兮日子
y'au ee jidcir
阿輝兮娘
a'Huy ee niaa
唔知悲哀
mxzay pi'ay
是唔是結束矣
si-mxsi ketsog aq
詩人
Sijiin
詩集攏愛困矣
Sicip lorng airkhuxn aq
市聲漸行漸遠
chixsviaf ciam kviaa ciam hng
市塵漸漸落定
chixtiin ciaxmciam loeqteng
回望即段蕭瑟
huebong cid tvua siausek
行過武昌街
kviaa kuex Bwchiofng-kef
歸去
歸去
kuy khix kuy khix
亦無風雨亦無晴
ia booe hongho ia booe zhefng
無愛亦無憎
Booe aix ia booe zefng
歸去
歸去
Kuikhix kuikhix
倒佇眠床頂
toer ti binzhngg terng
看月光照佇
khvuax gueqkngf cioex ti
窗邊兮藍布衫
thangf pvy lvapox-svaf
想存在佮虛無
sviu zunzai kab hibuu
想我詩故我在
sviu guar sy kox guar zai
一下仔着困去矣
cidee'ar tioeh khuxn`khix aq
一下仔着袂記
cidee'ar tioeh be kix
空道是色色道是空
khongtoe si seg sektoe si khofng
明旦再會出日頭未
min'afzaix e zhud jidthaau be
唔管伊
mxkuarn`y
詩人那親像囡仔咧
sijiin nar chinchviu gyn'ar leq
夢見追趕春天兮蝴蝶
bang`kvix tuikvuar zhunthvy ee otiap
一隻一隻飛過來
cit-ciaq cit-ciaq puef`kuerlaai
死亡兮遊戲
Syboong ee Iuhix
迄陣仔足心適兮
Hid zun'ar ciog simseg`ee
咱爽一種死亡兮遊戲
larn sorng cit-ciorng syboong ee iuhix
咱倒頭栽行路
larn toerthauzay kvialo
行過圳邊兮楊柳
kviaa kuex zuxn pvy ee viuliur
行過溪邊兮林投
kviaa kuex khef pvy ee lvataau
迄陣仔
咱
Hid zun'ar larn
干礁對死亡有興趣
kantvaf tuix syboong u herngzhux
唔免等候穿烏衫兮
mxbern tafnghau zheng osvaf`ee
道士唸唸有詞
toexsu liaxmliam iwsuu
唔免聽候斑斑兮
mxbern thviahau panpafn ee
錫箔那親像蝴蝶飛起來
siahpoeh nar chinchviu otiap puef`khylaai
咱道開始死亡兮旅行
Larn toe khaisir syboong ee lwheeng
咱道倒頭栽
larn toe toerthauzay
滾過蒼白兮楊柳
kurn kuex chiongpeh ee viuliur
滾過滿山兮楓紅
kurn kuex muafsvuaf ee hong'aang
迄陣仔 上帝
Hid zun'ar sioxngte
嘛是無法度啊
ma si booe huatto aq
因為咱爽一種
In'ui larn sorng cit-ciorng
死亡兮遊戲
syboong ee iuhix
爽了當心適
sorng liaur tngf simseg
迄陣仔 誠爽快
Hid zun'ar cviaa sofngkhuaix
紅霞燒紅半天邊
aang siaa sioef aang pvuax thvipvy
白楊白頭笑弄秋風
peg'ioong pegthaau chiorlang chiuhofng
阮逐家倒頭栽
guarn tagkef toerthauzay
一路栽白葱
Cidlo zay peqzhafng
啊 誠大誠大兮白葱
Aq cviaa tua cviaa tua ee peqzhafng
青苔
Chvithay
行過溪岸時
kviaa kuex khehvua sii
我甚麼都唔是
guar sviafmih toe mxsi
耳空充滿着水聲
hvixkhafng chiongbuarn tioeh zuir sviaf
頭殼內有天星兮閃晣
thaukhag lai u thvichvy ee siafmsiq
行過溪岸時
kviaa kuex khehvua sii
我將家已凝結做
guar ciofng kati lengkeg zoex
一片兮青苔
cit-phvix ee chvithay
千丈之下
Zhengtng ciha
趕着水聲兮水草
kvuar tioeh zuysviaf ee zuyzhaur
當咧無閒咧探聽歸路
tngf teq boe'eeng teq tharmthviaf kuilo
但是我無歸路
taxnsi guar booe kuilo
水聲輾哢叫
Zuysviaf lengloxng kioex
目珠看着兮
bagciw khvuax`tioeh ee
是滿溪兮煙雨
si muar khef ee enho
佮沈沈兮暮色
kab timtiim ee bogseg
我兮命運
Guar ee miaxun
我家己知影
guar kati zaiviar
我一定愛在
guar itteng aix zai
流動兮水聲
liutong ee zuir sviaf
千萬流動兮水聲裡
zhengban liutong ee zuir sviaf`nih
漸漸消
ciaxmciam siausarn
漸漸消失
ciaxmciam siausiq
我兮身軀
guar ee sinkhw
我兮面形
guar ee bixnheeng
牆仔
Chviu'ar
即款兮隔間
Cid khuarn ee kehkefng
是必要兮
親像
si pit'iaux`ee chinchviu
一首詩兮分行
cit-siur sy ee hunzua
創造飛騰兮意象
zhorngzoe huitheeng ee irsiong
牆仔提供隱私
Chviu'ar thekiorng wnsw
嘛滿足了自私
ma buafnciog liaur zuxsw
當然嘛創造鼠輩
tong'jeen ma zhorngzoe zhwpuex
偷看兮意念
thaukhvuax ee irliam
但是公正無私兮牆仔
taxnsi kongzexng boesw ee chviu'ar
亦相對保護
ia siongtuix poefho
清靜兮中晝時
zhengzeng ee tiongtaux sii
佫不受攪擾兮暗冥
kab putsiu kiawjiaur ee armmii
辟免喧嘩
phiahbern
suanhuaa
辟免驚惶
phiahbern kviahviaa
牆仔
Chviu'ar
造成好兮厝邊
zoexseeng hoer ee zhurpvy
好兮分行
hoer ee hunzua
造成好兮詩
zoexseeng hoer ee sy
春日
Zhunjit
一夜瀟瀟兮春雨
Cidia siausiaw ee zhun'ur
埕尾柴堆邊
tviaa buer zhatuy pvy
籃仔花跤
lva'ar-huef khaf
唔知啥儂留落來兮跤印裡
mxzay sviaflaang laau`loeqlaai ee kha'ixn`nih
忽然間發出草菇
hutjenkafn huad zhud zhawkof
風微微仔吹來
hofng bibi'ar zhuef`laai
送來新翻過
saxng laai syn huafn kuex
田塗兮芳味
zhanthoo ee phangbi
我佇窗仔邊
Guar ti thang'ar pvy
回想 舊年
huesviu kuxnii
春雨樓頭歕洞蕭兮
zhun'ur lauthaau puun toxngsiaw ee
少年 唔知
siaurleen mxzay
遠走他鄉
佇
uafnzaur thvahiofng ti
他鄉外里
thvahiofng guaxlir
落日兮樓台
logjit ee lautaai
是唔是猶原
si-mxsi iuguaan
穿一領白色兮台灣衫仔
zheng cit-niar peh seg ee Tai'uaan svaf
風裡嗚嗚咽咽
hofng`nih bengbeeng o'of
來歕一曲
laai puun cidkheg
黃昏兮故鄉
hoxnghwn ee korhiofng
所謂
Sofui
所謂出將入相
Sofui zhud-cioxng-jip-sioxng
所謂立功立德
sofui lip-kofng-lip-teg
只不過是幾個春天
cir-putkox si kuyee zhunthvy
佮幾個秋天
kab kuyee chiuthvy
幾個鶯飛佮草長
kuyee efng huy kab zhoer tiorng
幾個長空萬里
kuyee tngg-khofng-baxnlir
送雁群
saxng gan-kuun
幾個叮嚀在汝兮耳邊
kuyee tengleeng ti lir ee hvi pvy
幾個伶仃在奔波兮路上
kuyee lengtefng zai punphoef ee lo siong
幾個割喙鬂兮早起
kuyee kuaq zhuirchiw ee zafkhir
着共汝磨損
tioeh ka lir buasngr
幾個拓喙齒兮中晝
kuyee thog zhuirkhir ee tiongtaux
就共汝消磨
ciu ka lir siaubuaa
共汝打扮做沈腰潘鬚
ka lir tvafpan zoex tin'ioef
phvuachiw
幾個結領帶兮晚會
kuyee kad niaftuax ee armhue
就共汝妝金身
ciu ka lir zngf kimsyn
幾個異鄉客棧兮三更
kuyee ix'hiofng khehzaxm ee svakvy
幾個雞仔啼叫兮早起
kuyee kear thikioex ee zafkhir
幾個流浪兮歲月
kuyee liulong ee suerguat
着共汝戲弄
tioeh ka lir hirlang
共汝打扮做
ka lir tvafpan zoex
齒牙動搖而視茫茫
khygee taxngiooe jii si bongboong
頭毛落雪兮老儂
thaumof loeqseq ee lau laang
日之夕矣
jit cy sek ir
誠緊着黃昏啦
cviaa kirn toe hoxnghwn laq
誠緊就夜色淒迷
cviaa kirn ciu iaxseg zhebee
舉頭是滿天星宿
giah thaau si muafthvy sengsiog
然後踏着
Jen'au tah tioeh
家已消
落肉兮形影
kati siausafnloeqbaq ee hengviar
去走揣汝兮歸路
khix kviazhue lir ee kuilo
然後是搶天呼地兮
jen'au si chviwthvy-hote ee
隊伍一群
鐵釘仔四枝
tuixgvor cit-kuun thihteng'ar six-ky
墓牌一塊
共汝
boxngpaai cit-tex ka lir
送倒轉去塗州
saxng toertngr khix thociw
然後是草青青
jen'au si zhaur chvichvy
曠野朔風野大
khorng'iar sokhofng iaftua
最後
靈魂不靈
Zuerau lenghuun putleeng
番仔火殼仔內底
huan'afhuer-khag laixter
裝一個謎
互汝臆
zngf cidee bee ho lirn ioeq
互風雨臆
互野草臆
ho hong'ur ioeq ho iafzhaur ioeq
互野狗臆
互蟋蟀仔臆
ho iafkaur ioeq ho toxpefar ioeq
互天公伯也臆
ho thvikongpeq`ar ioeq
最後
缺憾
Zuerau khuat'ham
揕還天地
tirmheeng thente
無缺憾嘛
booe khuatham maq
揕還天地
tirmheeng thente
六月天
Lak Gueh Thvy
戴草笠
Tix zhawleh
搓田草兮下晡
soezhanzhaur ee epof
日頭光特別炎
jidthaau-kngf tegpet iam
汗涔涔流
kvua chimchiim laau
一點一滴
cit-tiarm cit-tiq
滴落咱兮田塗
tiq loeh larn ee zhanthoo
「六月天
“Lak gueh thvy
火燒埔」
huefsioef-pof
即款兮天氣
cid khuarn ee thvikhix
心內上蓋燥兮
simlai siong kaix soex`ee
是啉一杯冰水
抑是食一枝冰枝
iafsi lym cit-puef pengzuir
徛在田頭
khia ti zhanthaau
看無雉雞兮叫啼
?khvuax booe thixkef ee kioerthii
嘛看無白鴒鷥行來
ma khvuax booe peqlexngsy kviaa laai
行去
干礁
kviaa khix kantvaf
有一屑
風絲仔
u cidsut hongsi'ar
無偌遠兮松仔跤
booe jua hng ee zheng'ar khaf
猴死囡仔佇遐咧撦畚箕
?kausygyn'ar ti hiaf teq thuq purnky
正手爿兮鐵枝路
Cviarchiur peeng ee thihky-lo
「嘟」一聲
“tw” cidsviaf
糖廠兮小火車
thngg-chviur ee sioer huefchiaf
親像牛屎龜咧
chinchviu gusaykw teq
喘大喟爬過大地
zhuarn tuaxkhuix peq kuex tuaxte
即款兮天氣
Cid khuarn ee thvikhix
天是透明兮
thvy si thaurbeeng`ee
向東爿看過去
hioxng tafng peeng khvuax`kuerkhix
看無陶淵明兮南山
khvuax booe Thooe Engbeeng ee lamsvuaf
嘛看無黃色兮菊花
ma khvuax booe ng-seg ee kiok'huef
舉頭
看着兮
giah thaau khuax`tioeh ee
是徛佇吾鄉平野兮
si khia ti gvofhiofng peng'iar ee
蕭壟糖廠兮
Siaulorng thngchviur ee
大枝煙筒咧噴煙
tua ky engtaang teq puxn efn
結局
Ketkiok
佛祖講
Hutzor korng
有一工
u cit-kafng
咱逐家攏愛轉去
larn tagkef lorng aix tngr`khix
無定着 在
booe tviaxtioh ti
落雨兮早起
loeqho ee zafkhir
無定着 在
booe tvixtioeh ti
日落黃昏時
jit loeh hoxnghwn sii
風微微 煙筒兮
hofng bibii entaang ee
煙飛對西爿去
efn puef tuix say peeng khix
無定着 在
booe tviaxtioeh ti
幽悶兮暗冥
iubun ee armmii
天頂兮流星
thviterng ee liuchvy
晣一下落落大海
siq`cide lakloeh tua hair
落落遙遠兮天邊
lakloeh iau'uarn e thvipvy
有一工離開
u cit-kafng lixkhuy
父母兄弟
peqboer hviati
咱攏愛倒轉去
larn lorng aix toertngr`khix
可能是 隨風
khoefleeng si suii hofng
飄流 那
phiauliuu nar
風中兮草枝
hofng tiofng ee zhawky
可能是唯溪墘
khoefleeng si ui khekvii
沿輾哢叫兮水聲
een lirnloxng kioex ee zuysviaf
轉去 轉去
tngr`khix tngr`khix
無的確是
boetekkhag si
有一仔屑留戀
u cidsut'ar liuliam
有一寡仔哀悲
u cidkuafar ay'py
可能有一寡仔
Khoefleeng u cidkuar
銀紙隨風飛去
ginzuar suii hofng puef khix
可能有一寡仔
khoefleeng u cidkuar
陣頭陪咱轉去
tixnthaau puee larn tngr`khix
亦可能 無言無語
ia khoefleeng booe geen booe gir
無聲無說 恬恬
booe sviaf booe suad tiaxmtiam
來轉去 那親像
laai tngr`khix nar chinchviu
一枝蜡條風中化去
cit-ky lagtiaau hofng tiofng huaf`khix
那親像灶空兮柴火
nar chinchviu zaurkhafng ee zhahuer
慢慢來化去 那親像
baxnban laai huaf`khix nar chinchviu
火灰慢慢冷去
huefhw baxnban lerng`khix
即款兮結局
Cid khuarn ee kekkiok
任何儂無法去逃閃
jixnhooe laang booe huad khix toesiarm
捶胸匣
塗跤
tuii hengkaq zaxm thokhaf
摔頭摔耳 結局
hvaix thaau hvaix hvi kekkiok
攏嘛愛倒轉去
lorng ma aix toertngr`khix
唔免目箍紅
mxbern bagkhof aang
唔免目屎滴
mxbern bagsair tiq
落雨兮早起
loeqho ee zafkhir
抑是月光兮暗冥
ia si gueqkngf ee armmii
在竹眠床兮草蓆
ti teg binzhngg ee zhawchioeh
在無邊兮蕭颯
ti booe pvy ee siausab
在搖動兮秋風秋雨裡
ti ioetong ee chiuhofng chiuho nih
烏衫一軀
of svaf cit-sw
棺柴一具
kuazhaa citkhu
鐵釘仔四枝
thihteng'ar six-ky
咱攏愛轉去
larn lorng aix tngr`khix
唔免哭唔免啼
mxbern khaux mxbern thii
甚麼所在來
sviafmih sofzai laai
甚麼所在轉去
sviafmih sofzai tngr`khix
唔免哭唔免啼
mxbern khaux mxbern thii
眾生平等
ciorngsefng pengterng
終其尾也攏仝款
ciongkibuer ia lorng kaxngkhuarn
咱攏愛乖乖轉去
larn lorng aix kuaikuay tngr`khix
有一個儂
U Cidee Laang
有一個儂
U cidee laang
日頭落山
jidthaau loeqsvuaf
無想卜轉去
booe sviu bueq tngr`khix
伊
那像白鴒鷥
y nar chviu peqlexngsy
大街小巷
tuaxkef sioefhang
行來行去
kviaa laai kviaa khix
有一個儂
U cidee laang
瘦甲那親像風
sarn kaq nar chinchviu hofng
佇幽悶兮半冥
ti iubun ee pvuarmii
佇生冷兮街巷
ti chvilerng ee kehang
走來走去
kviaa laai kviaa khix
兩爿兮店鋪
nng-peeng ee tiarmphof
當落眠當好困
tngf logbiin tngf hoefkhuxn
伊舉頭
y giah thaau
看無半粒星
khvuax booe pvuax liap chvy
伊指頭拎恒恒
y cythaau gim an'aan
想卜一戶一戶
sviu bueq cit-ho cit-ho
拍
兮窗仔門
phaq yn ee thang'ar mngg
將
一個一個
ciofng yn cidee cidee
叫精神
kioex zengsiin
有一個儂
U cidee laang
佇大街小巷奔走
ti tuaxkef sioefhang punzaur
汗一直滴一直滴
kua ittit tiq ittit tiq
那親像咧落雨咧
nar chinchviu teq loeqho leq
伊卜向每一個窗仔
y bueq hioxng muir cidee thang'ar
講話 大聲講話
kofng'ue tua sviaf kofng'ue
伊卜沿路
y bueq enlo
唱歌 向逐家大聲唱歌
chviurkuaf hioxng tagkef tua sviaf chviurkuaf
已經三更半夜
ykefng svakvy-pvuaria
伊猶原無想卜轉去
y iuguaan booe sviu bueq tngr`khix
伊來去如風
y laai-khix-juu-hofng
揮汗如雨
huy-kvua-juu-ur
伊像一隻白鴒鷥
y chviu cit-ciaq peqlexngsy
佇台灣兮上空
ti Tai'uaan ee sioxngkhofng
飛來
飛去
puef laai puef khix
佇台灣兮夜色
ti Tai'uaan ee iaxseg
伊兮目箍紅紅
y ee bagkhof ang'aang
伊心內一聲一聲
y simlai cit-sviaf cit-sviaf
叫台灣兮名字
kioex Tai'uaan ee miaji
伊卜繼續奔走
y bueq kersiok punzaur
繼續喝咻
kersiok huahhiw
繼續 叫醒
kersiok kioex chvir
兩爿咧困兮百姓
nng-peeng teq khxun ee pehsvix
一直夠雞仔啼
ittit kaux kear thii
一直夠島嶼兮東爿
ittit kaux toefsu ee tafng peeng
出現日頭光
zhut'hen jidthaau-kngf
台灣天光
Tai'uaan thvykngf
悲哀
Pi'ay
悲哀兮現代儂
Pi'ay ee hexntai-laang
現代儂兮悲哀
hexntai-laang ee pi'ay
現化儂兮悲哀
Hexntai-laang ee pi'ay
是出門愛紮一枝雨傘
si zhutmngg aix zhaq cit-ky hoxsvuax
預防不測兮風雲
uxhoong putzheg ee honghuun
此外 佫愛帶一大把
zhwgua koeq aix tuax cit tua per
兮鎖匙 開大門兮
ee soefsii khuy tua mngg ee
開房間兮 開衫樹兮
khuy pangkefng ee khuy svatuu ee
開車門兮 開辦公廳兮
khuy chia'mngg ee khuy paxngkofng-thviaf ee
開辦公桌兮屜仔兮
khuy paxngkofng-toeh'ar ee thuafar ee
現代儂兮悲哀
hexntai-laang ee pi'ay
是愛紮赫爾濟兮鎖匙
si aix zaq hiah`niq ze ee soefsii
出門橐袋仔叮叮咚咚
zhutmngg laktear tingtifng tongtofng
現代儂兮悲哀
Hexntai-laang ee pi'ay
是按怎斟酌
si afnzvuar cimciog
按怎謹慎
着會
afnzvuar kynsin tioeh e
袂記帶鎖匙出門
be kix tuax soefsii zhutmngg
然後在轉去兮路裡
jen'au ti tngr`khix ee lo`nih
雄雄想着
hionghioong sviu tioeh
大聲喊慘矣
tua sviaf hiarm zharm aq
然後可能兮情形是安爾
Jen'au khoeleeng ee zengheeng si afnnef
是三裀半冥
si svakvy pvuarmii
佇家己兮門外口
ti kati ee mngg guaxkhaur
看家己兮大門
khvua kati ee tuaxmngg
摸家己兮頭殼
bofng kati ee thaukhag
看滿天兮夜色
khvuax muafthvy ee iaxseg
看滿天兮星
Khvuax muafthvy ee chvy
佇遐閃晣
ti hiaf siafmsiq
汝嘛那親像天頂兮
lir ma nar chinchviu thviterng ee
星咧 親像電火柱
chvy leq chinchviu texnhuef-thiau
風露中宵
hofng lo tiongsiaw
膠蠘兮哲學
Kazuah ee Tekhak
拜鴨母寮豬哥堀兮
Paix ahboer-liaau tikoef-khud ee
鴨仔佮豬仔做師傅
ah'ar kab ti'ar zoex suhu
閒閒無代誌罔變罔變
engeeng booe taixcix bofngpexng bofng pexng
佇眠床頂訓練
ti binzhngg terng hurnlen
傳宗接代兮工夫
thuanciofng ciaptai ee kanghw
生上蓋好
Svy siong kaix hoer
活着是一切
uah`teq si itzhex
袂曉見笑兮生
bexhiaur kerngsiaux ee sefng
唔知影見笑兮活
mxzaiviar kerngsiaux ee uah
佇看袂着日頭光兮
ti khuax be tioeh jidthaukngf ee
菜櫥衫仔櫥 偷偷仔
zhaix-tuu sva'ar-tuu thauthau'ar
食 偷偷困 偷偷仔
ciah thauthau'ar khuxn thauthau'ar
活 活
活過
uah uah uah kuex
幾何個時代
kuyna-ee sitai
幾何個春秋
kuyna-ee zhunchiw
有天無日頭無要緊
u thvy booe jidthaau booe iaurkirn
佇陰濕兮所在
ti ymsid ee sofzai
佇烏暗兮壁角
ti o'axm ee piahkag
偷偷仔喘喟
thauthau'ar zhuafnkhuix
偷偷仔食
偷偷仔哈肺
thauthau'ar ciah thauthau'ar hahhix
有東時食飽佫會弄拐仔花
u tangsi ciaqpar koeq e lang kuay'ar-huef
平時愛當做戰時
Pengsii aix tngzoex zerngsii
只要斟酌唔通互儂掠着
cy'iaux cimciogmxthafng ho laang liah tioeh
互儂一手抦死
ho laang cit-chiur tvir`sir
互儂一跤踏死
ho laang cit-khaf tah`sir
佇驚儂兮碗盤箸籠
ti kviaf laang ee vuafpvuaa tixlarng
碗仔碟仔
vuaf'ar pheh'ar
愛斟酌人類兮橫霸霸兮眼光
aix cimciog jinlui ee hvuaai parpax ee gafnkofng
愛注意臭礬兮攻擊佮DDT粉兮封殺
aix zurix zhaurhuaan ee kongkeg kab DDT-hurn ee hongsad
膠蠘遵奉
Kazuah zunhong
祖傳兮哲學
zofthuaan ee tekhak
「生就好
“sefng ciu hoer
活着是一切」
uah ciu si itzheq”
卜參人類鬥智
yn bueq zhafm jinlui taurtix
卜含時間拔大索
yn bueq ham sikafn pueh tuaxsoeq
膠蠘堅持即款兮信念
kazuah kengchii cid khuarn ee sirnliam
只要活咧
cy'iaux uah`teq
有一工
即族
u cit-kafng yn cid ciok
會變做泱泱大民族
e pexng zoex iongiofng tua binzok
無怨嘆兮青春
Booe Uarnthaxn ee Zhengzhwn
──後記
------Auxkix
最近五六冬來，自從替我小弟三郎也（a×）寫第一首兮台語歌詞：「漂泊兮心情」了後，我規身軀遼落去台語歌詩兮創作。即五六冬，我放棄台北城有淡薄仔成就兮補習班事業，轉來生育我、養飼我兮故鄉佳里興潭仔墘；全心拍拚來做台語兮研究，台語歌詩、台語散文兮創作,以及台語文學理論兮思考佮創建；甚至唔管一切，冒着風寒，忍受三更半冥兮冷清，開車拚去台南府城教南市「傳統文教學會」開辦兮「台語研究班」，以及「台語兮師資班」；有幾何擺誠好兮工作機會，佇我兮身軀邊閃過，因為時間兮衝突，我只好選擇我終生兮事業；雖然有東時，互儂講無頭無路，店庄仔內，脞來脞去；我攏共伊忍耐起來。有兮教育機構，共我點誌做記號，唔敢用我，我心內清楚，但是我嘛笑笑矣──因為我知影我即世儂，上蓋重要兮是追隨前輩兮跤步；繼承非常丰沛（phong1-ghai3）兮民間戲曲、歌謠文學，發揚光大，蓮花化身；百尺竿頭，更進一步；來創造新台灣、新時代、有血有目屎兮正港兮台灣鄉土文學。
Zuerkin go-lak-tafng laai, zuxcioong thex guarn sioefti Samlong`ar siar te id siur ee Taigir kuasuu: “phiaupheg ee simzeeng” liaw'au, guar kuy sinkhw liaau loeqkhix Taigir kuasy ee zhorngzog. Cid go-lak-tafng, guar horngkhix Taipag-sviaa u taxmpoear sengkiu ee pofsip-pafn suxgiap, tngr`laai seng'iok guar, viwchi guar ee korhiofng Kalir Hengtham'ar-kvii; zuansym phahpviax laai zoex Taigir ee gefnkiux, Taigir kuasy, Taigir svuarbuun ee zhorngzog, ykip Taigir bunhak lylun ee sukhoer kab zhorngkexn; sixmcir mxkuarn itzhex, mo tioeh honghaan, jymsiu svakvy-pvuarmii ee lefngzhefng, khuichiaf pviax khix Tailaam Hwsviaa “thuanthorng bunkaux haghue” khuipang ee “Taigir gefngkiux-pafn”, ykip “Taigir ee suzw-pafn”; u kuyna-pair cviaa hoer ee kangzog kihue, ti guar ee sinkhw pvy siarm`kuex, in'ui sikafn ee chiongtut, guar cyhoer suafntek guar ciongsefng ee suxgiap; suijeen u tangsii, ho laang korng boethaau-boelo, tiaxm zng'ar lai, sooe laai sooe khix; guar lorng ka y jymnai`khylaai. Uxee kauriok kikox, ka guar tiarm-cix zoex kirhoe, mxkvar eng guar, guar simlai zhengzhoer, taxnsi guar ma chioerchioex`ee—in'ui guar zaiviar guar citsirlaang, siong kaix tioxng'iaux`ee si tuisuii zengpuex ee khapo; kerseeng huisioong phongphaix ee binkafn hirkheg, kua'iaau bunhak, huat'ioong-kongtai, lenhuef-huarsyn; pahchioeq-kanthaau kvicixn cit-po; laai zhorngzoe syn Tai'uaan, syn sitai, u hueq u bagsair cviarkarng ee Tau'uaan hiongthor bunhak.
一切兮爭論，攏是無必要兮，甚麼儂講台語唔是文學性兮語言，甚麼儂自我作賤：講咱兮鄉土語言，是三寶兮、無水準兮、無文字兮……攏是搵目珠咧講話兮。今旦日，上蓋重要兮是摕（theh8）出作品來，用咱兮台灣語言，寫偉大兮作品出來互逐家來評定；作品是上蓋好兮見證，其他兮爭論是了工佫了精神兮。作品若好，逐家道無聲無說恬摺摺啦。
Itzhex ee zenglun, lorng si booe pit'iaux`ee, sviafmihlaang korng Taigir mxsi bunhak-sexng ee gygeen, sviafmihlaang zuxgvor-zuxzen: korng larn ee hiongthor gygeen, si svapoer`ee, booe zuyzurn`ee, booe bunji`ee……..lorng si ngf bagciw teq kofng'ue ee. Kin'afjit, siong kaix tioxng'iaux`ee si theh zhut zokphirn laai, eng larn ee Tai'uaan gygeen, siar uytai ee zokphirn zhutlaai ho tagkef phengteng; zokphirn si siong kaix hoer ee kerngzexng, kithvaf ee zenglun si liaur kafng koeq liaur zengsiin`ee. Zokphirn na hoer, tagkef toeq booe sviaf booe ue tiam zuhzuq laq.
拍開心內兮門窗，好好仔來斟酌聽咱兮語言，注意伊兮語言肌膚，注意伊兮語言性格：伊兮音樂性，伊兮意象性，語言兮智慧，好好掌握、好好仔提鍊、好好仔發揮；我相信卜創造出好兮、偉大兮，充份表現咱兮大海洋精神兮作品，我相信一定有可能兮。
Phahkhuy simlai ee mngthafng, hoefhoefar laai cimciog thviaf larn ee gygeen, zurix y ee gygeen kihw, zurix y ee gygeen serngkeq: y ee imgak-sexng, y ee irsiong-sexng, gygeen ee tirhui, hoefhoer ciafngag, hoefhoefar thelen, hoefhoefar huat'huy; guar siongsixn bueq zhorngzoe zhud hoe`ee, uytai`ee, chionghwn piawhen larn ee tua hayviuu zengsiin ee zokphirn, guar siongsixn itteng u khoefleeng`ee.
人生兮路途雖然坎坷，但是文學兮研究，台語詩兮創作，互我誠大兮心靈安慰，互我愈戰愈勇、愈行愈有元氣。佇遮我感謝我兮父母、
佇非常散赤兮環境，互我安心讀書，佫寵恿（theng2-seng7）我輸在我愛文學，寫台語文學，同時佇遮我卜感謝生育我兮故鄉：嘉南平原兮塩分地帶，拍開我兮視野；漠漠兮塩田，波濤汹湧兮大海，豐富我寫作兮題材；佇遮，我亦卜（beh4）感謝咱兮祖先，
互我即款活跳跳兮，樸素、活潑、有頑強生命力兮語言，互我放膽來創作。同時，佇遮，我亦卜感謝「蕃薯詩社」兮同仁，因為逐家出錢出力，今旦日，咱則有法度來蓽路藍縷，開拓台灣鄉土文學兮新環境。同時，即本詩集兮設計者：楊國台兄，替我題字兮薛平南兄，替我寫序兮洪惟仁兄、林央敏兄，替我寫批評兮胡民祥兄，我嘛愛大大來表示感謝。
Jinsefng ee loxtoo suijeen khankheg, taxnsi bunhak ee gefnkiux, Taigir sy ee zhorngzog, ho guar cviaa tua ee simleeng an'ui,ho guar jur zexng jur iorng, jur kviaa jur u guankhix. Ti ciaf guar kafmsia guar ee pexboer, yn ti huisioong sarnchiaq ee khuankerng, ho guar ansym thagzheq, koeq therngseng guar suzai guar aix bunhak, siar Taigir bunhak,tongsii ti ciaf guar bueq kafmsia sengiok guar ee korhiofng: Kalaam pengguaan ee Iamhwn textai, phahkhuy guar ee sixiar; bogbok ee iamtviaa, phoetooe hiongiorng ee tuaxhair, honghux guar siafzog ee thezaai; ti ciaf, guar ia bueq kafmsia “Hancii Sy-sia” ee tongjiin, in'ui tagkef zhutcvii zhutlak, kin'afjit, larn ciaq u huatto laai pitlo-lvalur, khaithok Tai'uaan hiongthor bunhak ee syn khuankerng. Tongsii, cid purn sy-cip ee setkex ciar: Viuu Koktaai Hviaf, thex guar theji ee Siq Penglaam Hviaf, thex guar siar su ee Aang Uijiin Hviaf, Liim Iongbirn Hviaf, thex guar siar phuepheeng ee Oo Binsioong Hviaf, guar ma aix tuaxtua laai piawsi kafmsia.
